Dalta an Téarma - Oíche Shamhna 2025

Spiorad iontach inniu ag Searmanas 'Dalta an Téarma'

Dalta an Téarma - Oíche Shamhna 2025

Bhí gliondar croí orainn ar fad i gColáiste Ghlór na Mara chun bród a léiriú inár ndaltaí uile inniu ag Searmanas Dalta an Téarma. Cuireadh tús iontach leis an mbliain scoile i Mí Lúnasa agus tá sé deacair a chreidiúint an méid atá bainte amach againn mar phobal go dtí seo, cheana. Tá fuinneamh, dea-thoil agus spiorad pobail le sonrú i ngach seomra ranga, sa chlós agus sna gníomhaíochtaí éagsúla atá ar siúl againn i rith an téarma.

Fáilte roimh dhaltaí agus foireann nua

Chuir muid fáilte mhór roimh dhaltaí nua i mBliain 1, atá socraithe isteach go hiontach sa saol meánscoile. D’fhonn cairdeas nua a chothú, thug na daltaí cuairt ar an trá le déanaí le Múinteoir Ciara — lá lán gáire, spraoi agus comhoibriú. Fuair muid deis, freisin, fáilte a chur roimh roinnt ball foirne nua, atá anois lárnach i saol laethúil na scoile.

Torthaí na Sraithe Sóisearaí agus na hArdteiste

Ag tús an fhómhair, bronnadh torthaí na hArdteiste ar lucht na Séú Bliana 2024–2025. D’éirigh thar barr leo agus tá roinnt acu anois i mbun staidéir ar chúrsaí eolaíochta, na n-ealaíon, na polaitíochta agus réimsí eile in institiúidí tríú leibhéal ar fud na tíre. I mí Dheireadh Fómhair, ceiliúradh torthaí na Sraithe Sóisearaí leis an Idirbhliain, agus tá fíorbhród orainn as an obair chrua agus an tiomantas a léirigh siad ó thús a n-aistir linn anseo i gColáiste Ghlór na Mara. An té nach gcuireann san earrach, ní bhainfidh sé san fhómhair, agus nach fíor fós an seanfhocal úd do na daltaí a thuill torthaí den scoth dóibh féin sna scrúduithe stáit.

Gníomhú Aeráide agus Forbairt Inbhuanaithe

I mbliana, cuireadh tús leis an ábhar nua Ardteiste, Gníomhú Aeráide agus Forbairt Inbhuanaithe. Roghnaíodh Coláiste Ghlór na Mara mar scoil phíolótach don ábhar tábhachtach seo — an t-aon scoil lán-Ghaeilge sa tír a bhfuil an deis seo aici. Is mór an onóir dúinn a bheith chun tosaigh i gcur chun cinn feasachta agus gnímh i leith na timpeallachta agus tá an t-ábhar ag dul ó neart go neart, le Múinteoir Róisín á stiúradh ar bhealach taitneamhach agus spreagúil.

Ceoldráma na Scoile – Disco Inferno

Fógraíodh le déanaí gurb é Disco Inferno an ceoldráma scoile don bhliain 2025–2026. Rinneadh éisteachtaí spleodracha le gach dalta san Idirbhliain, agus tá na príomhrólanna, múinteoirí damhsa, foireann urraíochta, foireann mhargaíochta, foireann cúlstáitse agus an ensemble roghnaithe anois ag Múinteoirí Cian, Grace Ní Mhuirithe agus Grace de Búrca. Tá obair dhíograiseach ar siúl cheana féin agus tá gach duine ag súil le taispeántas den scoth i mí an Mhárta. Bígí cinnte súil a choinneáil ar an leathanach TikTok nua, á bhainistiú ag an bhfoireann mhargaíochta.

Nasc leis na Bunscoileanna

Thug ár ndaltaí cuairt ar a mbunscoileanna féin chun cuireadh a thabhairt do dhaltaí i Rang 4, 5 agus 6 teacht chuig ár n-oíche oscailte. Bhí sé álainn ár ndaltaí agus ár n-iarmhúinteoirí a fheiceáil i nGaelscoil Bhaile Brigín, Gaelscoil an Bhradáin Feasa, Gaelscoil Ros Eo, Gaelscoil Bhriain Bóroimhe agus Gaelscoil na Mí.

Oíche Oscailte na Scoile

Bhí ár n-oíche oscailte thar a bheith rathúil arís i mbliana. D’oibrigh foireann agus daltaí le chéile chun fáilte Uí Cheallaigh a chur roimh ár gcuairteoirí. Bhí ceol, taispeántais, cainteanna, bia, cluichí agus craic den scoth ar fáil ar an oíche — fíor-léiriú ar spiorad cairdiúil agus bríomhar an Choláiste.

Seachtain Mhata

D’eagraigh an roinn Mhata Seachtain Mhata den scoth le déanaí, le daltaí ag cur lena scileanna uimhearthachta agus ag baint súp as imeachtaí spraíúla, idir thascanna praiticiúla agus dúshláin chruthaitheacha. Glacadh páirt freisin sa chomórtas nuálaíoch First Lego League, rud a spreag smaointeoireacht eolaíoch, cruthaitheacht agus obair foirne i measc na ndaltaí.

Saol Gníomhach agus Foghlaim Lasmuigh

De bharr na haimsire breá i rith an téarma, bhí go leor deiseanna againn ár seit rothar úrnua a úsáid, spaisteoireacht a dhéanamh timpeall an cheantair, aer úr a fháil agus súp a bhaint as radharcanna álainn cósta Bhaile Brigín. Thug roinnt ranganna cuairt ar ghnólachtaí áitiúla freisin, ag cur le nasc na scoile leis an bpobal.

Foghlaim agus Tionscadail

Rinne daltaí tíreolaíochta na hArdteiste a bhfiosrúcháin le déanaí ar an trá — tionscadal tábhachtach a chuimsíonn 20% dá ngrád deiridh.
D’fhreastal ár ndaltaí Idirbhliana ar cheardlanna dornálaíochta le FightR Dublin agus ghlac siad páirt le Léim Thart chun a gcuid scileanna scipeála a fheabhsú.

An Coiste Gaeilge

Tá an Coiste Gaeilge níos láidre anois ná riamh! Tá daltaí agus múinteoirí ag glacadh páirte i gceardlanna le Gaelbhratach agus Gaeilge 21, agus tá comórtais éagsúla á n-eagrú acu timpeall na scoile. Ghlac siad páirt freisin sa mhórshiúl i mBaile Átha Cliath chun tacaíocht a léiriú don teanga — fíorshampla d’fhuinneamh agus díograis na ndaltaí i leith na Gaeilge.

Spórt

Bhí roinnt buanna den scoth ag ár bhfoirne spóirt i rith an téarma:

• Cailíní peile in aghaidh Dhámhnach Bat agus na Scéirí,
• Cailíní sacair in aghaidh Scoil Ghramadaí Dhroichead Átha,
• Buachaillí iománaíochta in aghaidh Lusca agus Ard Giolláin,
• Buachaillí sacair in aghaidh Scoil Chaitríona.
  
  Comhghairdeas lenár n-imreoirí agus a gcóitseálaithe ar fad!

Tionscadal Aimsire an ESB

Bhronn an ESB stáisiún aimsire nua-aimseartha ar an scoil le déanaí. Tá Múinteoir Aoife i gceannas air, agus tá daltaí ag bailiú agus ag anailísiú torthaí aimsire go rialta. Beidh an tionscadal seo ina acmhainn luachmhar do ranganna eolaíochta agus tíreolaíochta amach anseo.

Buíochas lenár gCúntóirí Scoile

Thapaigh muid an deis le déanaí ár mbuíochas a léiriú do na Cúntóirí Scoile a chuireann go mór le saol an Choláiste. Bronnadh bláthanna agus teachtaireachtaí buíochais orthu, atá anois crochta ar bhalla an aitriam – comhartha measa agus buíochais ó chroí.

Erasmus+

Tá ár dtionscnamh nua Erasmus+ faoi lán seoil idir muid féin, an Ostair agus an Phortaingéil. D’fhreastal múinteoirí ón scoil ar chúrsa traenála san Ostair chun tús a chur leis an gclár. Beidh daltaí ag dul ar mhalartáin chuig an Ostair, an Phortaingéil agus an Bheilg, agus beidh muid ag cur fáilte roimh ár gcairde idirnáisiúnta anseo i mBaile Brigín i mí Bealtaine.

Díospóireachtaí agus Ceardlanna

Ghlac an scoil páirt arís i nDíospóireachtaí Uí Chadhain, in aghaidh Scoil Chaitríona, Pobalscoil Ghaoth Dobhair agus Coláiste Oiriall. Is comórtas spreagúil é seo a chothaíonn scileanna teanga, smaointeoireachta agus argóinte i measc na ndaltaí.
D’eagraigh Múinteoir Grace de Búrca ceardlann aistriúcháin le hoifigigh ón Aontas Eorpach, deis luachmhar eile do dhaltaí an Ghaeilge a úsáid i gcomhthéacs gairmiúil idirnáisiúnta.

Searmanas Dalta an Téarma

Míle buíochas le Múinteoir Grace Ní Mhuirithe a bhí mar chomhordaitheoir ar shearmanas Dalta an Téarma. Ócáid álainn a bhí ann a chuir go mór le spiorad na scoile agus a chaith solas ar na daltaí a sheas amach an téarma seo — sa seomra ranga agus lasmuigh de.

Is mór againn an fuinneamh, an obair agus an spiorad pobail atá le sonrú i measc ár ndaltaí agus ár bhfoirne. Gabhaimid buíochas le gach duine as a gcuid oibre le linn an téarma seo, agus tá muid ag súil le tuilleadh eachtraí, dul chun cinn agus spraoi i rith an gheimhridh.

Daltaí an Téarma:

Bliain 1:

Lily Ní Choistealbha

Alfie Ó Máirtín

Clódagh Nic Eoin

Tadhg Mac an Fháiligh

Bliain 2:

Oisin Ó Ruiséil

Aisling Taoiling

David Ó Donnagáin

Bliain 3:

Emma Ní Mhaolagáin

Bobby Ó Catháin

Olivia Ní Chróinín

Órlaith Ní Riain

An Idirbhliain:

Róisín Ní Chionnaidh

Charlotte Ní Taoiling

Luke Ó Ciardubháin

Bliain 5:

Aoife Ní Mhordha

Liam Ó Domhnaill

Aoibheann Butterly

Bliain 6:

Martin Todaro

Amber Nic Stiofáin

Matthew Ó Cochláin

Aitheantas Speisialta: