Dalta an Téarma - Cáisc 2026

Grúpa traid na scoile ag seinm; Searmanas 'Dalta an Téarma', Cáisc 2026

Bhí téarma dochreidte againn i gColáiste Ghlór na Mara le déanaí – téarma a bhí lán le himeachtaí taitneamhacha, fiúntacha agus gnóthacha a léirigh fuinneamh, tiomantas agus spiorad ár bpobail scoile.

Bhí éachtaí acadúla le moladh againn freisin. D’fhreastail Conall Ó Raghallaigh, in éineacht le Múinteoir Eimear, ar Chomórtas an Eolaí Óig agus bhain sé ardmholadh amach ó na moltóirí. Ina theannta sin, d’fhoilsigh Roinn an Oideachais tuairisc ar Chigireacht Uile Scoile a rinneadh le déanaí, a léirigh go raibh an fhoghlaim agus an teagasc sa scoil ag leibhéal eiseamláireach, le ceannaireacht láidir, úsáid éifeachtach teicneolaíochta agus curaclam leathan, cuimsitheach i bhfeidhm.

Bhí rath iontach ar an spórt chomh maith, le bua dochreidte ag an bhfoireann iománaíochta fé 16 sa chluiche ceannais. Míle buíochas le Múinteoirí Cillian Ó Néill agus Éamon as a gcuid oibre. Ghlac Lauren Ní Fhearáin páirt freisin sa chomórtas snámha sinsir ar son na scoile.

Tá céim mhór bainte amach ag an scoil le déanaí, agus creidiúnú Erasmus+ faighte againn – a chiallaíonn go mbeidh deis againn daltaí agus foireann a chur ar mhalartáin thar lear go leanúnach sna blianta amach romhainn, agus go bhfuil an scoil aitheanta mar eiseamláir i gcúrsaí Erasmus+ san Eoraip.

Bhí réimse leathan gníomhaíochtaí ar siúl againn freisin. Bhí craic iontach ag Múinteoir Aoife Ní Chonmhaigh agus a cuid daltaí, agus iad ag dearadh róbait don chomórtas FIRST Lego. D’fhreastail grúpaí ón Idirbhliain agus ó Bhliain 3 ar cheardlann iriseoireachta i mBaile Átha Cliath, á heagrú ag TG4, agus thug ár ndaltaí L2LP cuairt ar Raidió na Life chun taithí phraiticiúil a fháil ar chúrsaí raidió.

Bhí áthas orainn fáilte a chur roimh Jenny Piaget, Ambasadóir na hEilvéise chun na hÉireann, chuig an scoil, áit ar bhuail sí leis an bhfoireann agus leis na daltaí. Buíochas le Mathieu agus Múinteoir Kiana as ucht an ócáid iontach a eagrú.

Bhí deiseanna idirnáisiúnta ag ár ndaltaí freisin. Thug cúigear ón Rang Erasmus+ cuairt ar Innsbruck san Ostair agus ar Mhünchen sa Ghearmáin, agus bhí am den scoth acu. Ag an am céanna, ghlac Múinteoirí Eimear Curtin agus Niamh páirt i malartán Erasmus+ foirne ansin, freisin. Chomh maith leis sin, chuir muid fáilte roimh Louna, ár ndalta malartach ó Lycée Vaucanson i Tours na Fraince, a bhain taitneamh mór as a seachtain linn, agus a thug cuairt ar Eispéireas Europa i mBaile Átha Cliath in éineacht leis an rang Erasmus+.

Bhí imeachtaí spraíúla agus eachtrúla ar siúl chomh maith. Bhí lá den scoth ag daltaí na hIdirbhliana ar Champas Spóirt na hÉireann, agus bhain daltaí na tríú bliana an-taitneamh as a lá eachtraíochta i gCarlainn, Co. Lú. Chuaigh an Rang Ardteistiméireachta ar thuras sciála go dtí an Pholainn freisin – seachtain iontach eagraithe ag Múinteoir Fiachra.

Bhí spórt agus spraoi le sonrú le linn Seachtain na Gaeilge, le réimse imeachtaí agus cuairteanna ar Ghaelscoileanna áitiúla. Míle buíochas le Múinteoirí Honor agus Grace de Búrca, chomh maith leis an gCoiste Gaelbhratach, as seachtain den scoth a chur ar fáil. Ina theannta sin, bhain daltaí taitneamh as Seachtain na Staire, go háirithe an lá gléasta suas agus an músaem soghluaiste – buíochas leis an Roinn Staire as a gcuid oibre. Chun cuir leis an méid oibre atá ar siúl ag an gCoiste 'Gaelbhratach' faoi láthair, tháinig Cianán Coilier, Caitlin Ní Ghiobúin agus Aoife Fraser sa tríú háit sa chomórtas ‘Dúshlán 30’ mar chuid den chomórtas náisiúnta, á eagrú ag Gaelbhratach.

Ar deireadh, ba é buaicphointe an téarma ná an ceoldráma iontach Disco Inferno. Tar éis míonna oibre, de chleachtadh agus de chruthaitheacht, cuireadh seó draíochta ar stáitse. Thar chúig sheó, mheall an léiriú lucht féachana ollmhór agus bhí siad ar a gcosa ag deireadh gach oíche. Tá muid thar a bheith bródúil as rang na hIdirbhliana agus an caighdeán den scoth a bhain siad amach. Comhghairdeachas ó chroí leis na daltaí agus foireann uile a bhí bainteach leis an léiriú agus buíochas leo siúd ar fad a thacaigh leis.

Mar chríoch, ba théarma den scoth é seo i gColáiste Ghlór na Mara – agus tá muid ag tnúth go mór le cuid eile na bliana!

Buiteoirí 'Dalta an Téarma'

Bliain 1:

Bliain 2

Bliain 3

Bliain 4

Bliain 5

Bliain 6

Aitheantas Speisialta:

Aitheantas Spóirt:

Lá Buí: Aitheantas speisialta don chúigear a bhí ag eagrú an lá

1. Lucy Grimson
2. Aoife Ní Mhordha
3. Liam Ó Domhnaill
4. Shannon Ní Bhroin
5. Alisha Nic Uidhir

Seachtain na Gaeilge:

Gaeilgeoirí an Téarma:

• Aileen Ní Ailpín (1-DÉ DANANN)
• Tadhg Mac An Fháiligh (1-NA FIANNA)
• Sophie Ní Shabhaois (2-AILILL)
• Daniel Ó Muireagáin (2-AILILL)
• Sadhbh Nic Gabhann (3-CONNLA)
• Michael Ó Raghallaigh (3-BANBA)
• Aoife Nic Giolla Dhuibh (4-GAILBHIA)
• Seán Ó Laocha (4-TEAMHAIR)
• Savannah Ní Sheachnasaigh (5-BÓIRIMHE)
• Lorcan Tapley (5-BÓIRIMHE)
• Poppy Ní Shiordáin (6- MUMHAN)
• Cathal Mac Conchra (6-LAIGHEAN)